مارى : بحبك
سلطان: الى يتنازل عن لابتوبه النهارة لاخوه , بكره ممكن يتنازل عن اى حاجة تانية ..– قول ماثور –
فنون: بحترمك جدا يا إنسانه.
جنى : أنقذنى يا حليب السعودية :(
مروة عوض : أنتى أجمل حاجة في كلمتنا.
بنت مصرية : بحب دماغك.
عمرو دياب: بتجيب الكاريزما دى كلها منين يا أخى !!
محمد منير: أبواب بتقفل ع الجناينى و ع الوزير .. لخصت يعنى ايه مصر في الجملة القصيرة دى.
شريف اسماعيل: صاحب البوم شريف وبشرى والصديق الجميل .. صدفك كترت يا اكسلانس ! , مرة تقدم حسن الشافعى للساحة الفنية..
شريف اسماعيل: صاحب البوم شريف وبشرى والصديق الجميل .. صدفك كترت يا اكسلانس ! , مرة تقدم حسن الشافعى للساحة الفنية..
فا يلقطه عمرو فورا , ومرة طعم البيوت لمنير تبقى الانترو بتاعتها منحوتة من اغنيتك :عيونى .. الى هيا تبقى توزيع حسن برضه !!
حازم امام: عندنا في مصر , الترميز دا متعة وعادة ربنا مايقطعها عادة , وفي ناس كتير اترمزت على الفاضى رغم انهم فعليا ميستحقوش وميستهلوش دا زى جمال عبد الناصر مثلا , انما لو في رمز حقيقى ونموذج حى لرقى إنسان فهو انت .. مبتكلمش عن مهارة وحرفنه لعب طبعا.
كأس مصر : على رأى واحد صاحبى زملكاوى .. خدنا الصفيحة !!
الامارات : أجمل ذكريات حياتى , ساعات بحسها بلدى الى بجد وجدانى .
يُتبع.
هناك 8 تعليقات:
انا بموت فيك يا احمد
بص بقى ان شفت البلوج بتاعك عند فنون و كنت هموت و ارد على البوست بتاع المرأة=الحياة بس اتكسفت جدا و قلت بلاش حشرية فى بلوجات الناس خصوصا انى استغلست نفسى جدا لما رديت فى مدونات افرض هم ما كانوش عايزين حد يرد عندهم؟
بس كل شوية كنت باجى اتطفل و اتحشر هنا لانى بجد بحب طريقة كتابتك جدا
المهم انى لما لقيت اسمى قلت ما بدهاش
هتشجع و ارد:D
انا كمان بحب دماغك جدا و بتعجبنى كتاباتك جدا جدا
يا ريت بس ما يطلعش تشابه اسماء بعد العريضة اللى انا كتبتها دى عشان شكلى هيبقى وحش اوى :)
مرمر: ربنا يخليكى ليا طول العمر, عشان انتى عارفه انك مش بس صاحبتى واختى.. انتى عارفه انى بحس نفسى ابنك..
سلمى:الى يشوف كده يقول انك هاتردى في بلوج العمر مثلا D: , الموضوع أبسط من كده .. وانتى نفسك ابسط من كده بكتير,أصلا متعرفيش انا كنت مبسوط قد ايه لما شوفتك راده في البوست دا , لما كتبت عن انى بحب دماغ بنت مصرية , كتبتها بعفوية الى بيقرا حاجات لحد فا تعجبه دماغه فا يعبر مباشرة عن دا ومتوقعتش بصراحة انك تشوفيه بس حبيت أقوله.. أنا ياستى يسعدنى و يشرفنى كمان انك تردى ديما في البلوج بتاعى و أى حد دماغه نضيفه وانا بحبها هايسعدنى بوجوده هنا, وبمناسبة البساطة.. انا كمان كنت مستصعب فكرة انى ارد عندك مع انى عايز ارد فعلا ! D:
أنا بتكلم عنك يا سلمى - واسمحيلى اناديكى باسمك - .. وعلى فكرة أنا بعد ماكتبت البوست دا دخلت عندك لقيت بوست طلعلى في وشى عن انك مبتحبيش الكلام الحلو , قولت امال لو كنت قولت مثلا انى بحب دماغها و سواق تيته كمان مثلا كانت عملت ايه P: , بس انتى زودت انه المهم يكون عفوى ومن القلب , وهوا فعلا كده.. فا ربنا يحفظك.
ومبسوط جدا برأيك فيا وبتفرق معايا اراء معينه في شخصى بصراحة..
نورتى يا جميلة (f)
طلباتك اوامر يا ست الكل .. وبعدين احسن كده الى بتعمليه دا , أصل انتى مش فاهمه ان مفيش اسباب عبيطة في المكان المؤبو دا , فا الى انتى بتعمليه دا الصح , هابقى احكيلك تفاصيل تانية باذن الله .. المهم ان احنا دلوقتى اتفقنا على مبدأ البساطة.. وكده او كده , انا اتشرفت بمعرفتك يا سلمى p:
ميرسى ده بس من زوقك يا احمد...انا اللى ليا الشرف بجد:)
انا اسمي مكتوب ( وش مبرق )
والله يا احمد شعور متبادل سبحان الله من القلب للقلب رسول :)
انت انسان محترم وحساس وصادق جدا جدا
حتى وان صدقك دا في بعض الاوقات صادم وعنيف
بس كفاية انه حقيقة مش كذب وادعاء
اشكرك بجد :)
فنون: ربنا يكرمك ياست الكل .. هوا انا عارف انى صريح زيادة عن اللزوم احيانا , وعارف ان ارائى المباشرة دى احيانا بتخسرنى الناس وبتجرحهم وانا اصلا مش من حقى انى اجرح بنى ادم , بس انا عمرى بجد مانتقدت حد , عشان مبحبش حد ابدا ينتقدنى غير لو انا اديته الحق لدا , فلما صحابى بيدونى الحق بقول الى شايفه بدون تزييف او ادعاء.. عموما الحياة اتفه من ان الواحد يقضيضها في تحوير وتزييف ..
شكرا ليكى يا فنون , وابسط واقل حاجة ان اسمك يكون موجود .. حتى لو معرفكيش شخصيا.
إرسال تعليق