لما تشرف في الدنيا وتملأ صراخا وعويلا عشان طلعوك من صمت وسكون وهدوء رحم أمك , لازم من أول لحظة في حياتك متسلمش بالامر الواقع ومتخليش اى حاجة تسيرك , خليك مُخير .. عشان كده لو جرؤا اهلك على ان أوضتك تبقى الاوضه الى جوه الى شباكها على المنور لازم تحتج وتشجب وتعملهم بوليكه .. ولو حكمت .. اقلعلهم ملط في قلب المكان !! عشان لو معملتش دا , وسُيرت زى الاهبل وخدت الاوضه دى .. متجيش تقول انى محذرتكش !! يا أخى المصريين دول شعب مالوش ملامح .. شعب تحس انه لازم يتحط في موسوعه جينيس للارقام القياسية في صفحة .. الشعب الهلامى المتذاكى المتعادى المتعاتى المتفاتى المتفانى المتواتى المتوازى !! عندهم مزاج يعملوا اى حاجة في اى وقت وفي كل وقت من غير مايعملوا اعتبار ولا حساب لاى حاجة ولاى حد في اى وقت ! يعنى انت شاب في مقتبل عمرك ومقبل على الحياة وكلك أمل وحياة وبهجة وسرور .. شاب زى الفل ! وتلاقى ان الحياة دى بقت مأساة .. ليه بقى؟ لانك لحظك السخيف خدت الاوضه الى بشباك ع المنور ! والقاطن بالغرفه ذات شباك المنور تلاقيه هوا أكتر الملمين والعالمين بادق اسرار وحكايات البيوت في العمارة ! عشان المصريين ميعرفوش حاجة اسمها خصوصية , بريفسيى يعنى ! مسمعوش عنها ولا هايسمعوا .. ياخويا تبقى قاعد على الكمبيوتر ولا قاعد بتقرا ولا بتعمل اى بتاع في النعناع .. تلاقى أسرة سعيدة هانئة شكلا , متوحشة متشلقه مضمونا .. بتستعرض بمنتهى التفانى ثقافتها الاجتماعيه .. تلاقيهم بقى بيتكلموا في قصص وحكايات قمة في الكوميديا والتفاهه ! وانت غصب عنك بتسمع , يعنى ماهواش تلصص او اقتحام لخصوصية حد .. لان كلهم بيتفننوا في الكلام بصوت عالى كيييك ! وانا قاعد اهو بكتب البوست وشامم ريحة سمك مشوى بيتعمل ! سمك مشوى الساعه 10 الصبح !!! مش عارف ليه ساعتها
افتكرت الموقف الى كان بيحكيه أحمد حلمى لما كان في شقته القديمة قبل مايشتهر وبتاع وازاى ان كان في تحت واحد اسمه ابو راويه بيلعب طاولة باين 24 ساعه , وازاى ان كان في واحده فوق اسمها ام كوثر باين بتنده على أحمممممممممد - بطريقة الستات الشمطوات دى - , الفيديو دا معبر اوى عن حتة التاخى والتألف بين المصريين من خلال المنور ! , مش لاقى كود انك تحط يوتيوب في البوست , فا اللينك اهو:
http://youtube.com/watch?v=MaotQGu7zDY
الاشتراك في:
تعليقات الرسالة (Atom)
هناك تعليقان (2):
كان نفسي اشوف الفيديو بس عندي في الشغل قافلين يوتيوب :)
لما اروح بقى
انا عايزة اتكلم عن نقطة معينة في موضوعك
اللي هيا حكاية الخصوصية دي
مش بس مع الجيران
المصريين كلهم بلا خصوصية وكل حياتهم مشاع مشاع
تبقى قاعد في كافيه ولا روستوران
وتلاقي الناس اللي حواليك صوتهم عااااااااااااالي
وتلاقي نفسك اخر القعدة تكونت بينك وبينهم عشرة بحكم انك سمعت كل تفاصسل حياتهم ومشاكلهم وتوجهاتهم السياسية وارائهم في اللي بيحصل وزوقهم في المزيكا
ما بيعرفوش يتكلموا بصوت واطي نهائي
طيب مش عارفين تتكلموا بصوت واطي ما يضرش
بس راعوا بقوا بتقولو ايه طيب
في حاجات بجد ما يصحش ان اي حد معدي كدا يسمعها
ولا بقى الكلام ف الموبايل
تلاقي الشخص بيتكلم في الموبايل كان ماحدش سامعه
وتلاقي حاجات مذهلة
ببقى عايزة اقوله ياعم انت انت بتقول ايه بس
اقفل وابقى انكلم وقت تاني ما يصحش كدا
ولا بنت مثلا متخانقة مع الواد بتاعها وماشية في نص سيتي ستارز بتتخانق معاه في التيليفون بصوت عالي والدموع نازلة
ايه دا بجد
وبالتالي طبعا
بما ان الاغلبية ماعندهم خصوصية
ف ما تتوقعش منهم يحترموا خصوصيات الاخرين
هما بالتالي بيبقوا عايزين يقتحموا خصوصياتك بشكل مزعج فعلا
قليلا من الخصوصية ارجوكم
شوفيه اول ماتروحى عشان كوميدى فعلا :d , والله يابنتى انتى عندك حق .. انا بس كتبت البوست دا في عجاله عشان ريحة السمك المشوى دى جننتنى , بس لو على الخصوصية عند المصريين فا حدث ولا حرج , حوار الموبيل دا بيستفزنى بجد , ياعم والله العظيم هايسمعك لو اتكلمت بهدوء زى البنى ادمين ! , انما الاختراع دا ارتبط عند بعض الناس بالزعيق باين , وفعلا بيتكلموا في قصص شخصية جدا , الكوميديا بقى انه يقول للى بيكلمه , ان دا سر بينهم والمفروض محدش يعرفه !! d:, انا عايز اقولك انى مرة واقف في بلكونه بيتنا لقيت اتنين ماشين واحد ومراته بيتكلموا بصوت عالى لدرجة ان القصة وصلت ل: طلقنى ! , وانا طبعا قاعد متمزج ومستنى اعرف بقيه تفاصيل العلاقة, وهل هايطلقها في نهاية السهرة ولا لا !!
إرسال تعليق