الثلاثاء، 29 أبريل، 2008

تهون الدمعة..

تهون الدمعة فوق خدى ولا تهونى ..
يهون العمر ويعدى ولا تهونى ..
ولو عشقى في عيونك هان .. هاشيلك برضه في عيونى ولا تهونى.

بحبك .. لو طريقى طال .. ولو بينك وبينى محال .. هاجيلك .. هاجيلك .. هاجيلك لو هاعدى جبال..
واروحلك فين مابتكونى..

ولو عشقى في عيونك هان .. لو عشقى في عيونك هان .. هاشيلك برضه في عيونى ..

ولا تهونى ..

دى كلمات اغنية تهون الدمعة لمدحت صالح من فيلم اللبيس الفاشل دا ..

اه والله تهون الدمعة فوق خدى وتهون اى حاجة في الدنيا وانتى لاتهونى وعمرك ماتهونى ..
من قديم الازل وفي حاجات اساسية وغريزية في حياة الانسان بيدور عليها مكان مابيتواجد وبيكون..
زى الاكل وزى الشرب وزى المسكن .. دى بتبقى الحاجات الاساسية الى بتدفعه ليها غريزة البقاء الى فطره ربنا عليها.

مش عارف لو كلامى دا فيه نوع من المالبغه ولا ايه .. بس اعتقد ان في حاجة رابعه بتنضم للغريزيات دى ..

ومتقلش اهميه لا عن الاكل ولا عن الشرب ولا عن مكان المعيشه ..
غريزة الانتماء ..
مهواش انتماء لوطن , او مبدا او فكر او عقيدة او او او ..

لا .. غريزة الانتماء لانسان !

ايوه انسان زى زيك كده , بس الفرق انه من جنس اخر ..
لو كنت ذكر فا انتماءك لانثى ولو كنتى انثى فانتماءك للذكر..
انتماءك لانسان بيكون هوا حياتك او نصك التانى الى بتكمل حياتك معاه ..
احيانا الناس بتشوفنى انى رومانسى زيادة عن اللزوم او ببالغ في الوصف ..
بس انا عايز اسئل نفس الناس دى سؤال يتيم؟
هل العلاقات الانسانية شئ رومانسى ؟!
وهل التواصل والتقارب والتألف والانتماء بين البشر دى رومانسية كمان ؟!

دى الفطرة , الغريزة !

غريزة انك تنتمى لانسان , تمتلك انسان وتُملك بواسطة انسان اخر..
زمان كانت بتسمى العبودية لانها كانت بالغصب والعنوة والقوة..
بس النهاردة هيا رقى وبلوغ اقصى درجات من التألف والتواصل ..
ووسيلة انسانية لتحقيق الفطرة الربانيه - وجعلنا بينكم مودة ورحمة - ..

هيا الحياة , السكون في احضان انسانه او انسان..
الونس وميزة انك لما تموت تلاقى انسانه جنبك تغمضلك عنينك وتدعيلك بالرحمة..
وتحتفظ بذكراك مدى الحياة..

وهيا الانسانة الى ممكن تستغنى بيها عن كل الناس ..
فا تكون صديقتك وحبيبتك واختك وامك وكل حاجة..

بتكون اى وكل حاجة ..

بتكون الانسانه الى لو كنت انت بتتصف بكل سمات الجبن والانزواء ..
بتكون هيا وسيلتك للغضب والتمرد على وضعك الجبان !
مش لو جرالها حاجة او حد اذاها بتتحول غصب عنك لوحش كاسر ؟
وحش قادرعلى جميع فنون القتال ولا كأنك رجل المستحيل ..
وحش حل مكان جبنه وانكساره غضب ولا كأنه الف بركان جواك بتنفجر..
غضب حيوانى ان حد خد منك ماتملك..
ماتعشق وماتحب ومن اليه تنتمى..

حد خد منك او اذى صغيرتك البائسة..
لا حول لها ولا قوة في الحياة غيرك انت ..

الى بتشوفك وبتحتمى بيك وتمسك في دراعك او بمعنى ادق , تتعلق بدراعك !
ولا كأنك جيمس بوند..
مع انك في الحقيقة جسمك هزيل ومثير للشفقة..
ولو دخلت في خناقه , الى هايجي يضربك هايشفق عليك من هزالك دا وضعفك ..
وممكن كمان يديك ربع جنيه ولا حاجة ويقولك روح يابنى هاتلك كيس بوظو ولا حاجة , خناقه ايه دى الى فارد صدرك فيها !
ومع ذلك بتشوفك ولا بطل من ابطال الاساطير الاغريقية , مفتولين العضلات !

هيا دى فطرتها .. الرجل بغض النظر عن مواصفاته الجسمية هوا حاميكى وهوا مصدر امانك قصاد كل شرور الحياة..
هوا بطلك , هوا سندك , هوا حياتك ..
وهيا..
هي صغيرتك البائسة ..

هي حياتك وبنوتك الصغيرة ..

حافظ عليها وخلى اى حاجة في الدنيا تهون..
بس متخلهاش تهون ..
ولما تشوفها قولها: هاشيلك برضه في عيونى ولا تهونى ..

http://www.2shared.com/file/3216184/81b5d6fb/7abebey.html




الجمعة، 18 أبريل، 2008

شوشو ...

,شوشو..
قابلتك مع مارى في تورنيدو أول مرة , معرفش ليه حسيت ساعتها ان احنا هانبقى صحاب..
بس مجاش في بالى انك هاتبقى كمان من اقرب الناس ليا
مش عارف اقول ايه ..
ربنا يخليكى ليا
كل سنة وانتى طيبة يا شايما

الثلاثاء، 8 أبريل، 2008

الحبيبة في حياتى .. قريبا !

كنت محتاج انا بلوج زى دا عشان اتكلم عن معنى واهمية وجود البنت او الحبيبة في حياتى..
في حياتى في قصة حب حقيقية واحده فات عليها 5 سنين دلوقتى او اكتر.. وصاحبتها تبقى صاحب بوست : معاكى بضحك بصوت عالى

هاتكلم عن معنى العلاقة دى في حياتى ..

كمان في علاقة مش كاملة استمرت بس 4 شهور , بس كان ليها اكبر الاثر في حياتى ..

المهم ان دا محتاج ذهن صافى عشان اتكلم عنه .. قريب باذن الله.

الجمعة، 4 أبريل، 2008

البنى ادمين في حياتى.. بحبكوا والله !

حلو اوى جو الشئ ونقيضه الى عامله في البلوج هنا..
بوست بيتكلم عن الزبالة والحيوانات في حياتى..
وبوست بعديه فورا يتكلم عن البنى ادمين النضاف الى بحق وحقانى في حياتى ..
انا اتكلمت ووصفت في اكتر من مكان البنى ادمين دول , لذا هاكتفى بذكر الاسامى مع تعليق بسيط ..
عشان اكتشفت ان كلمة تغنى عن سطور من الوصف ..

مارى : بعشقك عشق شجرة الارز لعلم لبنان , لك تؤبرينى !

شيما : بموووووووووووووت فيكى .. اخر حاجة !

نانسى : رب كان ليك حد قريب في حياتك , فا مفيش حد تانى ممكن يبقى قريب ليك غيرها , مفيش خالص خالص يعنى - بيت شعر -

غادة : مجنوووووووووووونة .. بس مجننانى .. اه والله ! , بحبك اوى ونفسى تفهمى دا بقى !!

سولتو : بحمبك حومب , محمبوش انسان في الدونيا !

حنان : حبيبى .. حبيبى ورجالى .. اموووووووووووووووووووووووووووووووووووووووووووووووووووووووووووووواه !

واخيرا كم قال الموطرب الحاسيس , حسام حبيب :
تروح فين م الى بيحبك .. وعشان خاطرك على استعداد , يبيع نفسه عشان نفسه يكون جنبك كفاية بعاد..
صحابى والله منا سايبكوا .ولو بينى وبينكوا بلاد , تعديها واسوق فيها خلاص قفلت معايا عناد

اسيبك لا دا مقدرش اسيبك .. الف الدونيا عشان عنيك .. ادوس في النار عشان بس اجيبك , مين يلامنى عليكوا :@

اسمع دى منك ليها :

http://www.zshare.net/download/953361758ff1e3/

الزبالة في حياتى..

كنت كاتب هنا كلام كتير عن البنى ادمين الزبالة الى قابلتهم في حياتى..
بس لقيتهم , أقل بكتير من انى اتكلم عنهم..
هاتصف الزبالة ايه باكتر من انهم زبالة !

خير الكلام ما قل ودل.

الثلاثاء، 1 أبريل، 2008

عـن إيمان الشيوي .. أتحدث !

عن الانسانه أتحدث..
اه والله انسانه , في زمن قل فيه البشر الى بجد وجدانى !
ايمان الشيوى دى ببساطة , تبقى معيدة من ضمن المعيدات الى عندى في الجامعة..
بس مش كل من اتخرج بقى معيد ومش كل من بقى معيد .. بقى ايمان !
مهما اتكلمت عن الانسانة دى مش هاوفيها حقها ابدا ..
هيا بنى ادمه بتدرس الاقتصاد بكل سلطاته وبابا غنوجه ..
وهي بنى ادمه اصلا لسه مخدتش الماستر - الماجستير - في تخصصها ..
ومع ذلك هيا استاذه اقتصاد من الطراز الاول ..
لا تقولى بقى دكاترة ولا بروفيسرات ولا الكلام الفاضى دا ..
ايمان عندها سلاسه في الشرح وتوصيل المعلومة اقوى من اى حد ممكن تقابله ..
بس الحقيقة انا مبحبش الانسانه دى للاسباب دى , لان اكيد في كتير بيعرفوا يشرحوا كويس ويسهلولك الكورسات بتاعتك ..
بس انا بتكلم عن الانسانه المحترمة الراقيه , النموذج الحرفى لبنت الناس !
طيبة غير معقولة وغير متوافره في الزمن دا , بساطة وحلاوة روح تخليك تموت فيها بجد ..
ابتسامة ديما على وشها لما تشوف اى حد ..
معندهاش حاجة اسمها لا , في اى وقت وفي كل مكان بتلاقيها موجوده تشرحلك وتفهمك الى انت عايزه من غير ماتبدى اى امتعاض او ضيق او اى حاجة.

عندها سعه صدر انها تسمعك وتتقبل منك اى اعذار لو محضرتش كلاستها , وعموما بعيد عن دا هيا اصلا بتدى اعمال السنة كاملة لاى بنى ادم عندها بس بشرط يكون محترم وبيحترمها مش بيستغلها او بيحور عليها لانها على قد طيبتها فهى كمان هارشه صنف الطلبه الزبالة دا وما اكثرهم في ال MSA

البنى ادمه دى انا خدت معاها 3 كورسات لحد دلوقتى , وهاقول ببساطة انى كنت باخد اى مادة هيا بتديها او انزل مادة وادخل مادتها بدلها لمجرد انها المعيدة الى بتديها ..

وقفت جنبى بجد كتير في شرح او تقدير لظروف معينه مريت بيها السنة الى فاتت , سمعتنى وسهلت عليا حاجات كتير ..
ومش بسيب اى مناسبة فيها سيرتها الا لما اقول فيها قصايد مدح تستحقها تماما ..

متعرفنيش شخصيا ولا احنا صحاب ولا حاجة بس ممكن تلمس قلق حقيقى في صوتها لو عرفت انك تعبان او عندك ظروف معينه عشان كده مكنتش بلاقى حرج انى احكيلها اى مشكلة عندى.

ايمان.. انسانه بجد , طيبة ومتحفظة وبنى ادمه ماشيه ستريت في حياتها .. عشان كده ربنا هايكرمها ديما باذن الله.

انا بموت في حاجة اسمها ايمان الشيوي..
ربنا يكرمها باذن الله في الماستر الى بتحضره وتاخده وترجع بقى عشان بجد وحشتنا اوى اوى اوى ..

البوست دا اهداء بسيط واتمنى انه يوفى ولو حزء بسيط من حق الانسانه دى ومن كل حاجة قدمتهالى..

ويوم ماتخرج من الجامعة السخيفة دى , هافتكر ديما ان بعد ربنا كانت ايمان السبب في دا ..

وهافتكر كمان انه على قد سخافة كل حاجة في الجامعة دى ..

كان في حاجة راقيه جميلة .. اسمها ايمان الشيوى.