السبت، 29 مارس، 2008

معاكى بضحك.. بصوت عالى

معاكى بضحك بصوت عااااالى ..
من ضمن سامبلز البوم منير الجديد كان في اغنية اسمها معاكى بضحك بصوت عالى ..
قلبت عليا المواجع.. فكرتنى بالذى مضى..
مش عارف ومش متاكد اذا كان الى مضى دا كانت ذكرته حلوة كفاية عشان افتكره دلوقتى ولا لا..
بس كل مافتكر انه ازاى كنت بضحك بصوت عالى..
ازاى كانت الحاجة بتبقى تافهه وصغيره ونضحك .. ونضضضحك !
بصوت عالى ومن القلب وبكل الجوارح يعنى.
معتقدش ان تفاهه او كوميدية الحاجة دى كانت هيا الى بتضحكنا..
لا..
كانت السعادة .. سعادة اللحظة وانا بين ايديها ..
لحظة وانا معاها ..
وانا على السجية..
بتافهاتى وبسخافاتى , بعصبيتى ..
بجموحى وهدوئى.. بسكونى وهروبى..

بنشوتى وانا شايفها بتبكى قدامى ..
نشوة مابعدها نشوة..

نشوة انى امسحلها دموعها , اطبطب عليها , ولولا من بقيه خجل كنت حضنتها كمان..

كنت معاكى بضحك بصوت عالى..
بيفرحنى صوتك الهامس..
اسرح لما نتهامس..
في صوتنا لما يتلامس ..
ويسرقنى نغم هامس..
ويحلالى..

معاكى بضحك بصوت عالى ..

مطلوب حبيبة !! - مكملتش لسه ..


مطلوب والنبى حبيبة..
المواصفات بتاعتها مش كتير ..
مش هاقول تكون ملاك او بتطير..
تكون لقلبى قريبة
تكون عليا خايفه
حنينه..
جميلة , جمال ايفوليت ..
بتحب اوى زى جوليت..
مش هاكون ليها روميو..
بس هاكون ليها حبيب..
يسندها وقت الضيق..
يحضنها ياخدها لبعيد ..
يشيلها من ع الارض شيل..
يحميها مهما اتدهله حيل..
يديها كل الامان ..
ميحرمهاش ابدا م الحنان ..
دمعتها تجرحله قلبه ..
تتعبه وتحرقله دمه..

بكرة تروق وتحلى !


بيقولك اسبوع وتبتدى الزعابيب..
عواصف تشيلك وعفرة تجيب..
الدنيا هاتصيف والشمس ماهتغيب..
بيقولك اسمها الخماسين .. طب ليه مش التلاتين؟
بيقولك الوش بيبقى فيه بق وعين ..
جبت التايهه يعنى يا عب معين؟
ليه البنى ادم مغرور..
ليه شايف الناس كلها عور..
وفاكر ان لكل سؤال جواب..
لما يسال السؤال يلاقى الجواب..
لا يا سيدى مهياش فوضى..
انت بنى ادم عايز عمرة
تفوق م الى انت فيه
وتروح تعمل احسن عُمرة
يمكن بحياتك تتهنا..
والزعابيب تخلص وتحل عنا
ساعتها الدنيا هاتبقى احلى..
ويبقى صدق الى قال ديما..
بكرة تروق وتحلى..
والى ليه شوق في حاجة..
ربه ليه يعدلها..

بحبكوا والله ! - مع الاعتذار لفؤش

يالها من حياة مليئة بالمفأجات !

مكنتش اتصور ان احمد المصرى - الملول ذو الخلق الاضيق من خرم الابره - هايقعد زى البنى ادمين الطبيعين ويعمل بلوج - مبحبش كلمة مدونة دى - ويكتب فيه بقى ويقول ويعيد ويزيد !

هاتجنن .. مش عارف اكتب ايه !!
ياخويا تفتح المدونة بتاعت اى حد من هنا تلاقيها ماللييييينه !

اعتقد ان مشكلتى تتلخص في ان الكتابه بالنسبة لى هي مزاج , وعلى حسب المود.
وبالتالى تلاقينى بكتب لما بحس انى عايز اكتب.
وانا النهاردة كنت خدت قرر فتح البلوج , اما مساله الكتابه دى فا دى راجعه للظروف المزاجنجيه.

بالنسبة لكلمة سؤال الموجوده اعلاه..
دى ببساطة اسم اغنية قد تكون في البوم منير الجديد ..
بتقول الاتى:

سؤال .. بسئلك ايه اخره الترحال
وسهر الليالى.. وكل يوم بحال ..

سؤال بسئلك .. ايه اخره الاحزان..
دمعتى موالى .. والحنين كداب..

سؤال بسئلك .. ايه اخره الاحلام ..

اعتقد ان دا ملخص لحياتى .. هوا السؤال اياه الى بسئله لنفسى من ساعه ماشرفت في الدنيا..
نهايته ..
لحين كتابه اول سطر في كتاب حياتى - مش بتاعت حسن الاسمر - ..

أشوفكم على خير !