الاثنين، 12 مايو 2008

ارحموووووووووونا بقى !!!


عالم سخيف .. سخيف لابعد الحدود ..
هو الى بنحي فيه دا ..
كل شئ فيه مزعج وممل ومقزز كمان ..
عالم كل واحد فاكر نفسه انه ابن الى برام ديله فيه ..
وفي الى عايش في دور المصلح الاجتماعى وهوا او هيا حتة سيكوباث بغيض ..
كنت بتخنق اوى من الناس الى بتدى لنفسها الحق انها تقول على دا او دى انه مريض او متخلف اجتماعيا ..
دلوقتى انا بقع في نفس الخطأ بس عن اقتناع بالى بقوله ..
حتى لو سأل سال , وايه الى يستثتنيك من قائمة المرضى؟!
هارد واقول ان كل البشر مرضى نفسيين زى ما قال فيلسوف المانى نسيت اسمه ..
انت في حياتك اليومية اصلا بترتكب من التناقضات مايرقيك لمنصب كبير المرضى النفسيين في مجتمعك !
بس الحقيقة انه لو كانت دا طبيعة بشرية , فا في من البشر من يتجاوز تلك الطبيعة البشرية وبيأفور لدرجة مقززة !!

ومحدش يا سادة , يتكلم عن بوادر برانويا بتظهر في الافق القريب والنبى ..
انا زاهد في الحياة كل الزهد من كتر ما مريت وقابلت وتعاملت وجربت ..
فا دلوقتى لا يعنينى شئ في حياتى غير حياتى نفسها ..

انا كل الحكاية انى بنى ادم قرر من زمان انه يكون على فطرته !
وانه لما يلاقى حاجة متقزز وقرفان منها لازم يتكلم ويقول فيها وعنها والا هاينفجر..
زى ماتعودت ديما انى اتكلم واقول اى حاجة بحس بيها في لحظتها حتى لو اتُهمت بانى احيانا بكون سليط اللسان ..
او حتى متسرع او حتى مش مدرك للى بقوله او او ..

دا بالنسبة لى احسن واريح بكتير من انى اشيل جوايا سواد ومجموعة من المشاعر البغضيه نحيه افراد في حياتى..
الاولى انى اتكلم واصارح على سبيل الصحة النفسية مش اكتر..

افففف .. يالله , مش ممكن كم التناقضات وكم الشلل الدماغى المزمن الى بشوفه في شخصيات في الحياة دى..
ومحدش وهوا بيقرا البوست دا يسال نفسه - لو كان شايف انه بالاهمية دى او شايفنى شخصيا بالاهمية دى برضه لدرجة انى اقول رأى فيه - هوا يترى بيتكلم عنى؟

لا .. انا مش بتبع طريقة الاطفال الهطلة دى بتاعت التورية والخوازيق الى من تحت لتحت ..
انا بس قرفان .. قرفان من بشر كتير حواليا .. قرفان من التصنع في الطيبة والبراءه وفي الحكمة و في الشجاعة و في خفة الدم السخيفة , قرفان من الخسة والدناوة و السيس .. ولا الزياطين يا جدعان ..والعيال الى لسه بكوافيلهم
قرفان من رغبه كل البشر على صنع نموذج مثالى لشخصايتهم ..
وحسيت انى عايز اتكلم .. ولو في المبدأ نفسه حتى , عشان انا مش بات مان الى جي يخلص العالم من الوحشين !

ياعم ويا حاجة الكمال لله وحده والله العظيم !!

لو كل بنى ادم عاش حياته وحرص على انه يبين عيوبة قبل مميزاته هاتبقى الحياة جنه..
يا سلام لو تكلم الواحد وتظهرلك عيوبه من اول كلمتين بيقولهم ..
احترمه اوى وابوسه من بوقه كمان .. عشان بيثبتلى انه ميهموش وتتحرق الدنيا بالى فيها .ز
انا كده اهو زى منا .. TAKE IT OR LEAVE IT !!
بس ليه وليه بقى ..
مياكلش الكلام دا مع البشر , مش طبيعتهم ولا دماغهم ..
واحد يقولك ما دا ديدن البشر يا عبقرى زمانك وانك لازم تظهرنفسك الاحسن والاقوى والاظرف والاجمل والاعقل والاجمد والاشد والا والا الا الا الا.. مختلفناش !!
بس يعنى مانت مش نبى ولا انت قراءن عليا انى اقول امين عليه ..
دا الرسول الكريم قالك وما انا الا بشر مثلكم !!

عايز ايه اكتر من قول عليه الصلاة والسلام يعنى ؟!

ياااه مش ممكن يعنى كم الشخصيات الحلزونية الى حوالين الواحد بجد ..

أنا مش ملاك .. والله العظيم انا بغلط اكتر من اى بنى ادم عايش حياته , بغلط كل ثانية وكل دقيقة وكل ساعه وكل يوم وكل سنة وهافضل اغلط طول عمرى ..

بس يا جدعان مش بتكسف ولا بدارى ولا بمثل ولا بقول سوفاج وياى !!

واحد يطلع زى الخازوق ويقول ومين قالك يا عبقرى زمانك ان دى صفات الشخصية القويمة دا لو كنت من الغرور لدرجة انك تقول انك شخصية قويمة !!

اقوله ياعم الحاج مين اتكلم عن شخصيات قويمة ومتزنه هنا؟!

مفيش مخلوق خلقه ربنا كان متزن وكان قويم للدرجة دى او كان مثالى..

كلنا زى الزفت, شخصياتنا فيها من العيوب والقصور والقاذورات ماننافس بيه الشيطان شخصيا ..
بس كونوا واضحين , على طبيعتكوا .. ابوس ايديكوا يعنى !!!

بين سخافاتك وعيوبك المقرفة , مش مشكلة.. على الاقل تعمل تصفية جسدية للى مش هايستحملوك ومش هايقبلوها ..
وتضم لنفسك مجموعة من الصادقين الى بيحبوك لانهم لمسوا فيك نفحة امل ونور في انك فيك حاجة محترمة تتحب !!

نهايته عشان نازل جامعتى دلوقتى ..

انا قرفت واتخنقت , وبقول لكل متخلف ومتخلفة.. جتكوا القرف مليتوا البلد وضاقت بيا وبيكوا ويا انا اهج يا انتوا تهجوا !!
البوست دا غالبا هايكون هوا الاخير لفترة طويلة .. لانى قررت وعلى طريقة ماجدة الرومى بتاعت اعتزال الغرام..
قررت اعتزل الحياة بسخافاتها وبسلاطاتها وبابا غنوجها ..

مش هاموت نفسى يعنى اكيد ..

قعدلكوا يا ولاد اللذينا !!

بس افوق واسنجف امور حياتى عشان دى اهم اكيد واولى .. بس مقدرتش اقاوم رغبه انى اكتب واطلع الى جوايا قبل ماشيط وانفجر وتجدوا صعوبة في تجميع اشلائى , خصوصا انى مليت شوية الفترة الى فاتت وهاتصبعوا عليا اكيد !

ولا اقولك ياعم .. دع الخلق للخالق !

هناك 16 تعليقًا:

غير معرف يقول...

من فترة للتانية بعدي على كل المدونات ..ومن ضمنها مدونتك في مدونات أصدقائي :)

الموضوع ده لفت نظري فعلا..

صدقني..العالم مش سخيف..

المشكلة إن إحنا إللي عاوزينه سخيف..أيوة إحنا إللي عاوزينه سخيف..

معدناش بنثق في حد..أو نصدق حد

إلا لو حد إحنا عاوزينه..إممم

حد بنحبه وعاوزين نخلق له صورة مفيش زيها


مثلا فنان أو ممثل..

رغم انه بيغلط

صدقني

احنا عندنا استعداد نصدق التماثيل اللي بنصنعها احنا بإيدينا وتكون في صورة كاتب أو فنان


ومنصدقش بعض كبشر عاديين عايشين في وسط بعض :)


صدقني.متحكمش على أي شخص وإللي جواه..غير من موقف تمر بيه معاه

لأن طول ما هنقول..محدش بالصورة دي


هنقع في سوء الظن

وتشتعل بقى زي ما بيقولوا ثورة الشك جوة الناس


ومش هنطيق العيشة ولا اللي عايشين فيها

وده غلط فعلا..وبيتعب كل شخص من جواه..

فعلا هيتعبه..


مش عارفة يمكن بقول اي كلام


بس فعلا..فيه نماذج حلوة كتيرة بجد..

وكلهم بشر..لازم يغلطوا ويصلحوا أخطائهم


لكنهم..مش زي النماذج الغريبة إللي في الصورة دي :)


اسمحلي طبعا بالتعليق ده في مدونتك :)

شكرا :)

غير معرف يقول...

هقولك حاجة تانية كمان :)

آسفة اتكلمت كتير معلهش :)


من نعم ربنا على عباده بجد


الستر


بيستره لما بيغلط


يمكن علشان كدة..لو هو اتكسف من غلطه ومن ربنا..مش بيصرح بغلطاته دي..وجه الصح



بس يمكن اللي انت بتتكلم عنه..


إنه يبقى منافق


يقول حاجة ويعمل عكسها..


متهيألي ده الغلط..والله أعلم كلنا..بنعمل كدة فعلا ولا لا؟!!



لأن تصدق..الواحد فعلا كتير بيقول حاجات وينصح..وهو مش بيعمل بيها خالص

بس..


أهو..كل الناس كدة..مين فيهم عارف نفسه..وقت ما بيتحط في موقف..بيتصور نفسه إنه قادر يدي نصيحة رغم انه مش بيعمل بيها..أنا وانت وكتير من الناس..يمكن كدة


الأمور بسيطة قوي..


خد الأمور بسلاسة زي ما بيقولوا و حسن نية..ومتتضايقش كتير من كل حاجة حواليك..بلاش تركز..




آسفة والله رديت كتير..بس تصدق فعلا الموضوع ده أو زي ما بتقولوا البوست ده استفذني معلهش :D


معلهش آسفة بقى لاقتحام مدونتك والرد كدة :)

Ahmed EL Masry يقول...

استغربت فعلا وجودك هنا لانى معرفكيش شخصيا , عموما يا ستى اهلا وسهلا نورتى .. مش عارف ايه منطقك في الحكم على الامور بس شايفك مثاليه طول الوقت وديما شايفه الحياة وردى وبتاع.. لا يا ستى محدش عايز يشوف العالم سخيف ولا حد من الفضى انه يتعب نفسه ويتعامل مع السخفا الى بيهرتلوا على طول الخط .. ويعيشوا ادوار مش لايقه عليهم ولا تأكل معاهم .. وبينى وبينك انا حد خلقه ضيق , مبيستحملش نوعيه البشر دى .. وبيتخنق منهم بسرعه .. ومش فاهم اى منطق عبقرى دا الى بتقوليه؟ , ورغم انى مبحبش اسلوب التورية السخيف دا , فا انا مش مقتنع ان الواحد ممكن يخلق صورة لحد ويصدقها ويقتنع بيها , الا لو كان الحد دا شخصيته متميزة فعلا تجبرنى انى اصدق واقتنع فيه وساعتها بقى اعمله تمثال اعمله طبق بابا غنوج حتى , المهم انه من الرقى المناسب انى اقتنع بيه وطبعا دا بين البشر العاديين , لان المثل الى ضربتيه بالممثل او الفنان دا مثل عجيب , دا بنى ادم كل علاقتى بيه انه نجم بشوف اعماله لكن لا اعرفه شخصيا ولا هاعرفه وبالتالى مش هايشغل الحيز دا من حياتى.. انا لما بجى احكم على بنى ادم بيكون بناءا على تعامل وخبرة سابقه معاه , مبجيش من الهوا واقول فلان الفلانى كذا او علان العلانى كذا برضه .. دا اسمه اسلوب طفولى , فكرتينى بحد اعرفه كده ماشى يقول اراء في خلق الله وهوا لا يعرفهم ولا عمره اتعامل معاهم اصلا , مع انه ممكن يكون فيه من العبر الى تخلى الواحد يشمئز من معرفته .. وحد زى دا بينطبق عليه البوست دا تماما , لانه ادى الحق لنفسه انه يبقى عبقرى زمانه وينتقد بنى ادمين , مع انه مش مثالى ولا حاجة ولا هوا الحد الخلاصه ولا كمان ليه الحق في دا .. بس تقولى ايه بقى , بشر !!

الكمال لله يا ستى في كل الاحوال .. انا في البوست دا بتكلم عن نماذج سخيفة ومتخلفة قابلتها او شوفتها في حياتى , وحيث انى حد عصبى وبُستفز بسرعه - ودا احد اخطر عيوبى - فا كان لازم اطلع كل المشاعر الفياضه الى انتى شايفاها , الصورة بالمناسبة معبره عن البوست بس اكيد النماذج دى مبتعضش او بتتحول لممصصاين دماء زى مانتى فاكره , ابقى شوفيلى صورة مناسبة وانا اوعدك انى احطها..


اما بالنسبة لردك التانى .. انا قولت انى بحترم البنى ادم الى مبيهموش , الى بيدوس في اى حاجة وانا بحاول ديما اكون الانسان دا .. انه يكون عنده شجاعه الاعتراف بالخطأ , محناش بنتكلم هنا عن ملايكة منزله من السما , انتى بتتكلمى في بشر خطائين .. فا لو انت قد الفعل الى عملته مهما كانت درجة صحته من غلطه كون شجاع انك تعترف بيها , اما اخوانا البعدا بتوع النصايح الى مبيعملوش بيها دى فدول مش منافقين , دول اغبيا ومزعجين ! , رحم الله امرؤ عرف قدر نفسه .. اعترف بغلطاتك و خلى عيوبك تبان لانها هاتبان هاتبان بس على الاقل متلعبش دور الحد الوقور صاحب الاراء النيرة وانت اصلا حد فاضى يعنى .. وانا شخصيا بستحقر نوعيه الشخصيات دى , هايجرا حاجة في الكون لما تكون انسان عادى جدا , بسيط جدا , بتتكلم في حدود عقليتك ودماغك جدا , وحش ساعات و كويس ساعات جدا ! .. نهايته .. هوا عالم سخيف مليان بالسخفا .. بس فيه نماذج محترمة وبنى ادمين يقتدى بيها , وانا عن نفسى قابلتهم واتعلقت بيهم ورفعتلهم القبعه زى مابيقولوا , لانى لمست فيهم انسانيات ملقتهاش في حد تانى.. ابقى اتفرجى على البلوج وهاتلاقيهم..

بالمناسبة انا احيانا بحس بنوع من اللف والدوران في كلامك , كونى مباشرة وشجاعه كفايه انك تكونى قد كلامك ديما , دا على سبيل الصحة النفسيه بيجيب نتيجة هايلة , وعن تجربة شخصية ;)

وبالنوسبة لكلمة معلهش دى , بتستفزنى جدا , ماتقولى معلش زى كل الناس ! D:

غير معرف يقول...

لا والله مقصدش :)

Ahmed EL Masry يقول...

مقصدتيش ايه بالظبط؟ , مريبه وعجيبه انتى فعلا على راى واحد صاحبى D:

غير معرف يقول...

أنا مش عارفة :D

بس أنا مقصدش إن يكون فيه زعل بدون قصد :D

بس الاموشنز دي بتظهر بس :)


هقولك والله أنا بتلخبط بس وأنا برد بس



كان قصدي يعني الرد في صورة نصيحة وكدة ليس إلا :)


فيه إموشنز إبتسامة أهو :)



أصل أنا بصراحة زعلت من التعليق ان فيه لف ودوران في كلامي وإني مش مباشرة


مش عارفة بس أنا فعلا مقصدش كدة والله...آسفة :)



المهم..بقول مقصدش لو ردي..


أي حاجة مش مشكلة :)


ومعلهش تاني اني اقتحمت المدونة وشفتها وكدة :)



وعلى فكرة فعلا شفت كتير من المواضيع هنا في المدونة :)


المهم..



ربنا يوفقك يارب :)



ومعلهش فعلا لو أزعجتك بدون قصد بدخولي المدونة :)



اموشنز الابتسامة فوق ظاهر صح :)




طيب مممكن طلب من غير زعل والله


آخر جملة ؟!!!!!!!!



:) :)

غير معرف يقول...

طيب..أنا كنت عاوزة أرد في البوست بتاع حنان..

بس فعلا اتحرجت تكون زعلت اني دخلت المدونة واتكسفت أرد :)


عاوزة والله أرد في كل مدوناتكم اللي بلاقيها في العناوين بس بتكسف تتضايقوا أو كدة :)

Ahmed EL Masry يقول...

أنا رديت عليكى في ايجى فيلم بخصوص كلامى عن حتة اللف و الدوران , ويا ستى مفيش اى فهم غلط لاى حاجة يعنى, انتى علقتى على موضوع في المدونة الى هيا متاحه للجميع اكيد .. وهوا بينى وبينك القصة مش محتاجه نصايح , الواحد يكاد يجزم انه شايف كتير وتعامل مع شخصيات كتير في حياته , فا البوست دا مش اكتر من ملخص لنوعيه الشخصيات الى في الحياة , واكيد زى ما في جانب سلبى , في جانب ايجيابى ولا ايه؟ , متقديش على حتة انك مريبة دى , دى دعابة مش اكتر D: .. ردى ياستى في اى بوست انتى عايزاه , مفيش اى ضيق او ازعاج او اقتحام , نورتى في كل الاحوال ومفيش داعى للاعتذارات :)

غير معرف يقول...

شكرا جزيلا ليك :)

وربنا يوفقك ان شاء الله :)

غير معرف يقول...

أنا آسفة والله اني رجعت أرد بجد


اعذرني بجد بعتذر :)

)*_*)

يمكن علقت في كلامي على نقطة الفنان لما بقول أحيانا بنصنع صورة جميلة أو تمثال بصورة معينة ونحبه



أنا قصدي..


أنا فيه فنانين كتيرة بحبها على فكرة

ويمكن بس من أدوارهم..يمكن بحس فيها بالصدق



لكن..أنا فعلا أحيانا وزمان

فيه شخصيات كتيرة حبتها..

يمكن كتاب..ويمكن شخصيات إعلامية

لكن لما كبرت..


حسيت إني كنت راسمة صورة لتمثال بصورة مبالغ فيها

وللأسف

اتغيرت وجهة نظري كتير..


بقول في بعض الشخصيات..مش أغلبها والله :)


يمكن ده توضيح لكلامي في النقطة دي

إني (( والله )) كنت بتكلم عن نفسي..إن ممكن نكون إنا كبشر..عاوزين نصدق نماذج إحنا إللي بنصنعها



يمكن النقطة اللي قلت فيها إننا أحيانا ممكن منرضاش نصدق بعض كبشر


صدقني..مش أقصد عليك بشكل مباشر فعلا..


كنت بقول..إحنا..كبشر (( والله)) :)


لأني فعلا قابلت ناس كتيرة


كانت مش عاوزة تصدق إن البشر لسة طيبين...أو كانت بتفترض..صدقني بقول اني فعلا ..أكيد مريت بصداقات..كان فيه اللي بيفترض ان الشخص طيب..خبيث بيخبي وراه صورة تانية..زي ما بيقولوا..سهن يعني


وكان فيه ناس بشوفها تقول..


إن الشخص ده..لإما أهبل..لإما بيستهبل


علشان كدة قلت لك..إن يمكن..إحنا مش عندنا استعداد نصدق بعض كبشر مش عارفة ليه..ونصدق نماذج تانية احنا إللي بنصنعها..في بعض الأحيان :)


إمبارح سألت بابا السؤال ده


ليه فعلا مش مقتنعين اننا نصدق بعض


وليه كل وش لازم نقول وراه وش تاني

أو ليه الخير يكون وراه شر



مقصدش على الموضوع ده نفسه



لكن..افتكرت تعليقات كتيرة ونماذج كتيرة قابلتها في حياتي..يمكن ادوهم صورة انا شفتها بشكل تاني..




بابا قاللي..لأن دلوقتي..مش زي زمان..


مفيش لا مثل طيبة زي ما كانت زمان بتتعرض في الأفلام..


أو..



مش عارفة..


أنا يظهر لبخت..وخرجت جامد...


لكن والله أنا فعلا بتوه لما برد..ويمكن تيجي في بالي نماذج كتيرة..وأخرج عن الموضوع



بس مختلفة لسة في نقطة..



الإعتراف بالغلط..



الإنسان ممكن يحاول يتغير من غير نفاق..


بس كتير..الأفضل ..الستر..وده في الدين..


على أخطاء كتيرة :)




زماني طبعا ضايقتك قوي بردودي دي..ويمكن تشوفها مش منطقية



اعذرني تاني بجد..أنا فعلا آسفة :)

غير معرف يقول...
أزال المؤلف هذا التعليق.
غير معرف يقول...
أزال المؤلف هذا التعليق.
غير معرف يقول...
أزال المؤلف هذا التعليق.
غير معرف يقول...

أنا آسفة بجد

إني دخلت المدونة من تاني ..آسفة لو بضايقك فعلا معلهش


بس..كتبت كذا رد وبعدين حذفته

لكن حصل موقف..اكتشفت ان ممكن فعلا كلامك كتير فيه صح..<<<


يمكن الموقف اني شفت فيه جماعة دينية سياسية..بتطبق حاجة..وللأسف..غلط..

لكن..بيتكلموا باسم الدين


ساعتها..رديت هنا..وحسيت ان ناس بيصدر منها غلط..وبتقول انه صح..

لكن..كتبت الرد وحذفته تاني كذا مرة..


أنا آسفة تاني والله لو أزعجتك بدون قصد أو رديت هنا كتير

آسفة بجد والله :)

غير معرف يقول...

إمم..يمكن ردي أنا إللي غلط ومحكمش على حد..حتى لو حاجة أنا شفتها..إن بعض الظن اثم..

آسفة على ردي..بس افتكرت الموضوع ده..لما حد قالي موقف..بيعمله جماعة باسم الأمر بالمعروف والنهي عن المنكر..وانهم تبع جماعة معينة

وحسيت ان اللي بيعملوه غلط.

إنهم يعاقبوا ناس..عقاب متهيألي..مش مع الدين من وجهة نظري..ويقولوا ده تطبيق للدين..

وقلت..غلط وبيقولوا ان صح وان تبع الدين..


بس..افتكرت الموضوع ده

وبعدين..!!!!!!!


عاوزة أحذف ردي تاني..ان بعض الظن اثم..!!!!

اتحكالي..يمكن اتحكالي غلط...ومحدش بيعمل كدة<<<<<<<<<<<<<<

وانا اللي غلطانة..<<<<<<<<<<<<<<<

!!

آسفة والله عن ردودي دي كلها..آسفة معلش للإزعاج والله بجد


وأنا باين خرجت عن فكرة الموضوع تماما..


آسفة

Ahmed EL Masry يقول...

مفيش داعى للاعتذرات دى كلها,أهلا وسهلا بيكى في المدونة.