دفا السبرتاية

- عارفة أنا حسيت بطعم السعادة إمتى ؟
- إمتى ؟
- لما حبيتك ..
- ...
- بجد من وإحنا في الجامعة لمّا كنا لسّه بنشُق طريقنا في الحياة ، وإنتي كنتي سَنَدي ، خدتي بإيدي وعدينا كل ظروف حياتي الصعبة ، كنتي دايماً الدفا اللي اتحرمت منه في صغري ، عُمرك أبداً ما حملتيني فوق طاقتي . كنت لما بشوف عينك بتروح على حاجة نفسِك فيها وأنا مش قادر أجبهالك كنت بتقطع من جوايا ، كنتي بتحسّى بيا وتحضُني إيدي أكتر وتضحكيلي وتقوليلى إنُّه بُكرة هاتجيبلي كل حاجة ، وحتى لو محصلش أنا مش عايزة أي حاجة ، عايزاك إنت وبس . ومادام إنتَ معايا يبقى في داهية أي وكل حاجة تانية ! عُمري ما نسيت كلامك ده . ساعتها بس فهمت كلام أمّي لما كانت بتقوللي " دوَّر على الزوجة الأصيلة " وإنتي أصيلة يا (نور) أصيلة وكل يوم بشوف حتة من روحِك النضيفة ، وكل يوم بعرف معاكي معنى جديد للسعادة .

صوت نهنهة خافتة ..

- بعشقك ..
- بعشقِك ..

----

من .. 4- Pursuit of Happiness